حكايات رمضانيه

الموضوع ده قريته فالجريده
وحبيت اكتبه عشان عجبني جدا
ويارب يعجبكم كمان
.
.
.
.
.
.
.
.
.
بصراحة واوعوا حد ريقه يجري لما نجيب سيرة الاكل وبعدين يحملني الذنب.......انا مش ناقص واللهم اني صايم ........لكن بيني وبينكم اجمل كلام في الدنيا خلال رمضان هو عن الاكل . وكل يوم يتجدد السؤال هناكل ايه النهارده؟!هنفطر ايه النهارده؟!وبيني وبينكم الواحد زهق طول رمضان من الاكل المسبك واللحوموالاسماك ونفسي رايحه على اكله ارديحي ماركة ولاد الحلال ......... يعني ايه رايكم في صنية مسقعه وجنبها طبق فول مدمس بالثوم والخل وشوية طعميه سخنه وطبق طرشي بلدي من اللي تاكل ايدك وراه ......وحزمتين تلاته جرجير وقرنين شطه خضره ولو فحل بصل مفيش مانع...البطن ياما بتشيل.
طيب بذمتكم الاكل ده مش يفتح النفس اكثر من الاكل المسبك والملبك!!!!!!
عموما بالهنا والشفا وصدقوني اجمل اكله في الدنيا هي اللي تاكلها بنفس......وعشان تاكلوا بنفس ايه رايكم بلاش تفكروا في اي حاجه تعكنن عليكم!!! يعني بلاش مثلا تفتكروا الحكومه واللي عاملاه فينا ودايما تقولوا يارب يجعل كلامنا خفيف عليهم.....طبعا قصدي الشياطين مش الوزرا.
كمان يستحسن بلاش تفتكروا ان المدارس بعد رمضان علطول وانها اتفقت هي والعيد انهم ييجوا مع بعض....اكنها ناقصاهم.بلاش تفكروا في لبس العيال وفلوس الدروس الخصوصية ومصاريف الكعك والبسكويت.
كلنا طبعا عارفين اي سيره في البلاوي المتلتلة دي تؤدي الى رفع نسبه الكوليسترول وهي طبعا مش ناقصه زياده.وصدقوني مفيش احسن من الستر والصحه وربنا قادر كريم يفرجها علينا من وسع.وبمناسبه اننا داخلين النصف الثاني من رمضان فرحت اوي بقرار الدكتور نظيف ان الناس تقبض المرتبات قبل العيد ....الراجل كتر خيره وطول لنا في عمر حكومته حاسس بينا وعارف ان العمليه ملطشه معانا .واللي الناس متعرفوش ان قرار زي ده جه بطلوع الضرس..... طبعا قصدي ضرس الدكتور غالي واهو كله على نوتة وزاره الماليه وربنا يستر لان الدكتور يوسف غالي مبيسبش حقه يضيع .....يعني مره لينا وميت مره علينا والميه تكدب الغطاس واكيد بعد العيد هيطلع علينا بكام تفنينه جديده يلم بيها قرشين من الناس ......صدقوني احسن من الصحه مفيش واوعوا تنسوا الاكله اللي قلت لكم عليها بس بامانه عليكم تدعولي ........رغم اني حاسس انكم هتدعوا عليا.....!!!!

ممتاز القط

اتمني تعجبكم

وكل سنه وانتم طيبين

موضوع جريء جدًا و صاحبه أجرأ

» حكايات من غزة